والدي

وانا صغير؛ خمس سنين تقريبا، لاحظت ان العيال بتبوس ايد ابوها لما يرجع من الشغل مثلا، الولاد عندي في الشارع كانو بيعملو كده، والولاد و البنات جيراني كانو برضو بيعملو كده، بدرجه من الجبريه و التقديس، مع تعالي مفرط من الاباء، كانهم ربنا مثلا او الاسكندر الاكبر، ولاني طفل ولسه جحش، قررت اقلدهم، اول واخر مره حاولت ابوس فيها ايد والدي وهو راجع من الشغل سحب كف ايده من بين كفوفي وسألني: بتعمل ايه يا احمد؟ ببوس ايدك يا بابا. ليه يا احمد؟ العيال كلها بتبوس ايد ابهاتها. واحنا من امتى بنقلد حد يا احمد؟ والدي كان رجل ايقوني، بوقاره وكبرياءه واناقته، ولما بتمنى احيانا اني كنت انتمي لعيله غنيه وافتكره، بجلد نفسي، واحس اني انا غير الجدير بأب زيه، سبلي ارث من الكبرياء والاعتداد بالنفس لا يقدر بثمن، ولا يمكن شراءه بأي تمن.