حياة

حلمت اني باخد كوز دره من غيط - كوز دره بحجمي تقريبا - وباكل منه على راس غيط، وبعدين بسحبه جوه بعيد عن الماره، وباكل منه برضه، بس وانا قاعد عليه، بيصحى طفل كان نايم في مكمني، ويجري ينده على اهله، بتيجي ست جميله جدا تزعق وتعيط وهي منفعله، بفهم من كلامها ان ده كوز الدره الوحيد في الغيط وان هو مهم جدا بالنسبالها، بحاول افهمها اني مكلتوش كله وكلت بس جزء منه، بلف الكوز واكتشف اني كلت اغلبه، بتنهار وتمسكني من كفوفي بكفوفها وتصرخ بعبارات منها ليه تخليني اعمل فيك كده؟ انا مش عايزه ائذيك تاني؟ مش عايزه، بتتداعي لذاكرتي علاقه ما كانت بتربطني بالست، وكأنها كانت زوجتي او حبيبتي، وبيهم الرجاله الاربعه بتأديبي باديهم وعصيانهم وحزامهم، بسيب كفوفها وارفع كفوفي احمي راسي ووشي، وانا باصص على غل غريب في عنيهم، وبحس بأول توكة حزام بتلدغ راسي، وبسمع من بعيد صوت بيقول " لا لا لا يا حياة " بعرف ان اسم الست حياة، وبشوف وجه منقذي السمح الطيب، وبقوم من النوم وانا بفكر في " حياة "