بتعرف تتوضى؟

بحس بالعطش؛ بخبط على باب، بتفتح زوجتي، بتحضني بدون تردد، بحضنها بدون تردد، بتحضني اوي، بحضنها اوي، بنتبه ان البيت مش بيتها، وانه غالبا بيت اهل جوزها، بتحس اني بنتبه، بتقبض على جسمي اكتر، بيخرج حماها من جوه، بقوله الموضوع مش زي منتا فاهم، بيسألني: انت بتعرف تتوضى؟ بستغرب من السؤال؛ بخاف. بس برد: طبعا بعرف، بيدخلني على مصرف حوض، ويخلي ابنه الصغير يراقبني، مية الصرف مش نضيفه، لكني بحاول احسن الوضوء، بيقوم الشاب الصغير ابن الكلب اللي كان بيراقبني وانا بتوضى، بسمع صوته وهو بيقول لابوه: مش بيعرف، بقوم من النوم خايف اكتر.