كتارا

كنت اشتركت في كتارا 3 مرات؛ كتارا جايزة روايه قطريه، وللعام التالت على التوالي اخسر، 3 مرات خساره خلوني اتاكد اني بياع بليله، واني ضروري ادور على ناصيه حلوه كده اقف عليها بالعربيه بتاعتي، سارا سيد الله يسترها قالتلي ندور على اسباب الخساره يا احمد - سارا الله يسترها تاني بتقولي يا احمد مش يا عفيفي؛ وبصوت ولاد الناس، اللي فيه احمد في اولها همزه مش عين - ممكن يكون التصحيح او المراجعه، وفا علوش الفائزه بالمسابقه السنادي صديقتي، بسألها: يكونش التصحيح و المراجعه يا وفا؟ قالتلي احمد؛ انت زي الفل، هم تقليديين جدا، ومنوي و جمال صربي قلمين على وشهم. كنت متصور ان كتارا مسابقه غير تقليديه، وكنت تقريبا جالي احباط على اكتئاب، لكن فوز وفا بصرني بالمطبخ جوه، كتارا مسابقه عايزه حد يحكي عن جذوره وعيلته وارضه ووطنه، زي ساق البامبو كده، وكومة قش لوفا نفسها، لكن فلسفه وجنس ودين، دول تروح تبلهم وتشرب ميتهم يا احمد، بصوت سارا سيد الله يسترها.